MINISTRY of SCIENCE and EDUCATION REPUBLIC of AZERBAIJAN

OIL and GAS INSTITUTE

Xəbər

2022-02-26 06:19:15 726

AMEA Neft və Qaz İnstitutunun əməkdaşı YAP Yasamal rayonunun Xocalı soyqırımının 30-cu ildönümünə həsr edilmiş tədbirdə iştirak edib

YAP Yasamal rayon təşkilatında Yasamal Rayon İcra Hakimiyyətinin və YAP Yasamal rayon təşkilatının birgə təşkilatçılığı ilə Xocalı soyqırımının 30-cu ildönümünə həsr edilmiş “Faciələrimizdən dərs alaq” mövzusunda tədbir keçirilib.

Tədbirdən öncə Xocalı soyqırımına həsr olunan rəsm sərgisi nümayiş olunub.

İlk öncə Xocalı soyqırımı və Azərbaycan Respublikasının müstəqilliyi və ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.

Sonra Xocalı soyqırımı haqqında hazırlanmış qısa videoçarx nümayiş olunub.

Çıxış edən Respublika Xocalı şəhid ailələri cəmiyyətinin sədri Mehriban Əliyeva Xocalı soyqırımı haqqında qəhərə boğularaq o günləri xatırlatdı. Mehriban xanım ailəsinə, yaxınlarına qarşı törədilən vəhşiliklərdən danışıb, həmin günlərin xalqımızın qan yaddaşında silinməz izlər qoyduğunu və heç zaman unudulmayacağını bildirib.

Milli Məclisin deputatı, professor Anar İsgəndərov 1992-ci il fevralın 25-dən 26-na keçən gecə baş vermiş Xocalı faciəsinin təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır soyqırımı cinayətlərindən biri olduğunu vurğulayıb. Bu soyqırımın Azərbaycan tarixinin ən dəhşətli və faciəli səhifələrdən biri kimi xalqımızın qan yaddaşına əbədi həkk olunduğunu deyən deputat 44 günlük Vətən müharibəsində Azərbaycan Prezidenti, Ali Baş Komandan İlham Əliyevin qətiyyətli rəhbərliyi ilə müzəffər Ordumuzun Xocalı qurbanlarının qisasını aldığını, onların qanının yerdə qalmadığını diqqətə çatdırıb.

Daha sonra çıxış edən Xocalı şəhəri 2 saylı tam orta məktəbin direktoru, Milli Qəhrəman Füzuli Rüstəmovun bacısı, Fiqurə Rüstəmova söyləyib ki, Xocalı qurbanlarının xatirəsini yad etmək, böyüməkdə olan nəslə XX əsrin ən dəhşətli hadisələrindən olan Xocalı soyqırımı haqqında ətraflı məlumat vermək, məktəblilərdə düşmənə qarşı barışmazlıq hissi, Vətənə, doğma torpağa sədaqət və məhəbbət duyğularını gücləndirmək, ən əsası tariximizi unutmamaq üçün əhəmiyyətlidir.

Tədbirdə Neft və Qaz İnstitutunun “Neft-qaz sahəsinin geoekoloji problemləri” şöbəsinin baş mütəxəssisi Fatimə Bayramova iştirak etmişdir.

Daha sonra tədbirin bədii hissəsi başlayıb. Respublika İncəsənət Gimnaziyasının şagirdləri Xocalı soyqırımı faciəsinə həsr etdikləri kompozisiyanı təqdim ediblər.