AZƏRBAYCAN RESPUBLİKASI ELM və TƏHSİL NAZİRLİYİ

NEFT VƏ QAZ İNSTİTUTU

Xəbər

2024-02-05 10:38:40 290

Neft Qaz İnstitutu ilə ADNSU arasında Anlaşma memorandumu imzalanıb

Fevralın 5-də Azərbaycan Respublikası Elm və Təhsil Nazirliyi Neft Qaz İnstitutu ilə Azərbaycan Dövlət Neft və Sənaye Universiteti arasında Elmi-tədqiqat üzrə fəaliyyətlərin birgə həyata keçirilməsinə dair anlaşma memorandumunun imzalanma mərasimi keçirilib.

İmzalanma mərasimində əvvəlcə Azərbaycan Respublikasının Dövlət Himni səsləndirilib və Azərbaycanın ərazi bütövlüyü uğrunda canlarından keçən qəhrəman şəhidlərimizin xatirəsi 1 dəqiqəlik sükutla yad edilib.

ADNSU-nun rektor əvəzi, dosent Vazeh Əskərov tədbir iştirakçılarını salamlayaraq ali təhsildə elmi tədqiqatların mühüm əhəmiyyətindən danışıb. ADNSU ilə elmi tədqiqat institutları arasındakı mövcud əməkdaşlıq əlaqələrinin genişləndirilməsinin və birgə elmi-tədqiqat işlərinin stimullaşdırma mexanizmlərinin təkmilləşdiriməsinin prioritet istiqamətlərdən olduğunu qeyd edən dosent Vazeh Əskərov bu baxımdan memorandumların uğurlu olacağına əminliyini bildirib.

Elm və Təhsil Nazirliyi Neft Qaz İnstitutunun baş direktoru, akademik Fəxrəddin Qədirov çıxış edərək ölkə başçısının tədqiqat universitetləri və tədqiqat potensialı yüksək olan ali təhsil müəssisələri ilə bağlı fərmanlarından irəli gələn məsələlərin həllində əməkdaşlığın genişləndirilməsinin mühüm əhəmiyyətindən və bu istiqamətdə potensial əməkdaşlıq imkanlarından danışıb, bundan sonra əlaqələrin yeni müstəvidə inkişaf edəcəyinə ümidvar olduğunu bildirib.

Sonra tərəflər arasında Anlaşma memorandumu imzalanıb.