AZƏRBAYCAN RESPUBLİKASI ELM və TƏHSİL NAZİRLİYİ

NEFT VƏ QAZ İNSTİTUTU

Xəbər

2023-05-10 08:07:33 529

Neft və Qaz İnstitutunda Ulu Öndər Heydər Əliyevin anadan olmasının 100-cü ildönümü ilə əlaqədar tədbir keçirilib

Tədbiri giriş sözü ilə institutun baş direktoru, akademik Fəxrəddin Qədirov açaraq, xalqımızın ümummilli lideri Heydər Əliyevin müasir müstəqil Azərbaycanın memarı və qurucusu olmaqla yanaşı, ölkəmizin dünyada tanınmasında misilsiz xidmətlər göstərdiyini söyləyib. Ulu Öndərin geniş dünyagörüşü görkəmli siyasi xadim kimi nüfuzu sərhəd tanımır və ölkəmizin təbliğində mühüm rol oynayıb. Xalqımızın yaddaşında yaradıcı, qurucu və xilaskar obrazını daim yaşadıb, qəlblərdə özünə əbədi məhəbbət qazanıb. Heydər Əliyevin Azərbaycana rəhbərlik etdiyi ötən əsrin 70-80-ci illəri yaddaşlarda təkcə iqtisadi yüksəliş dövrü kimi deyil, həm də elmin, təhsilin, mədəniyyətin misilsiz tərəqqisi illəri kimi qalıb. Məhz həmin dövrdə gələcək müstəqilliyimizin təməl daşları hörülüb, iqtisadi, sosial və mədəni potensialı formalaşıb.

İnstitutun icraçı direktoru, g-m.e.d, prof. Vaqif Qurbanov bildirib ki, dövlət müstəqilliyinin qorunub saxlanılması onun qazanılmasından daha ağrılı və çətin prosesdir. Belə bir ziddiyyətli və mürəkkəb mərhələdə dövlətin xilası məhz vətənpərvər liderlərdən asılı olur. Ulu öndərin 1993-cü ilin oktyabrında dövlət başçısı seçilməsindən sonra müstəqil Azərbaycanın hüquqi və siyasi-iqtisadi suverenliyinin təmin olunması prosesi daha da sürətlənmişdir. Ümummilli lider ilk növbədə, ölkədə ictimai-siyasi sabitliyin bərpası istiqamətində gərgin iş aparmış, qeyri-qanuni silahlı dəstələr zərərsizləşdirilmiş, respublikamızın sosial-iqtisadi yüksəlişinə yol açan ən mühüm amil kimi cəmiyyətdə ictimai-siyasi sabitlik bərqərar edilmişdir.

İnstitutun əməkdaşları Nuhbaba Şıxıyev, Lətif Sultanov, İsmayıl İsmayilov və Rahilə Əliyeva ümummilli lider Heydər Əliyevin dövlətçilik irsinin əsas istiqamətlərindən biri olan dövlətin milli təhlükəsizliyinin və ərazi bütövlüyünün təmin olunması haqqında fikirlərini söyləmişlər.

Tədbirin sonunda Gənc Alim və Mütəxəssislər Şurasının sədri Pünhan Səmədli tərəfindən Heydər Əliyevin anadan olmasının 100-cü ildönümünü əks etdirən video çarx nümayiş etdirilib.